Böyrək daşları uzun müddət heç bir əlamət verməyə bilər. Lakin daşlar sidik yolları ilə hərəkət etməyə başlayanda vəziyyət qəfil ağırlaşa və şiddətli ağrılar yarana bilər.
Böyrək daşları sidik-ifrazat sistemində minerallar və duzların toplanması nəticəsində əmələ gələn bərk törəmələrdir. Onlar hərəkətsiz olduqda insan heç bir narahatlıq hiss etməyə bilər.
1. Bel və ya böyrək nahiyəsində güclü ağrı
Böyrək daşlarının ilk əlamətlərindən biri belin və ya yan nahiyənin ağrımasıdır. Ağrı tutma şəklində baş verə, dalğavari güclənə və qarının aşağı hissəsinə yayıla bilər.
2. Tez-tez sidiyə getmək istəyi
Daş sidik axarında hərəkət etdikdə sidiyə tez-tez getmək ehtiyacı yaranır. Sidik ifrazı zamanı ağrı və ya narahatlıq hissi də müşahidə oluna bilər.
3. Sidiyin rənginin və qoxusunun dəyişməsi
Böyrək daşı sidiyin görünüşünə də təsir edə bilər. Sidik çəhrayı, qırmızımtıl və ya qəhvəyi rəng ala, həmçinin xoşagəlməz qoxu yarana bilər.
4. Ürəkbulanma və qusma
Şiddətli ağrı ilə yanaşı ürəkbulanma və qusma da baş verə bilər. Bu, orqanizmin ağrıya verdiyi reaksiyalardan biri hesab olunur.
5. Üşütmə və titrətmə
Üşütmə, xüsusilə də ağrı və ümumi halsızlıqla birlikdə müşahidə olunursa, ciddi fəsadların əlaməti ola bilər. Belə hallarda dərhal həkimə müraciət etmək tövsiyə edilir.
Nə vaxt təcili tibbi yardım almaq lazımdır?
Mütəxəssislər bildirirlər ki, bədənin vəziyyətindən asılı olmayaraq keçməyən, istirahətlə azalmayan və çox güclü olan ağrı təcili tibbi yardım tələb edir.
Böyrək daşı riskini artıran amillər
Böyrək daşlarının əmələ gəlmə ehtimalı aşağıdakı hallarda artır:
Gün ərzində kifayət qədər maye qəbul etməmək;
Duz, şəkər və zülalla zəngin qidalanma;
İrsi meyillilik;
Artıq çəki və piylənmə.
Həkimlər böyrək daşlarının qarşısını almaq üçün kifayət qədər su içməyi, balanslı qidalanmağı və ilk simptomlar ortaya çıxan kimi həkim müayinəsindən keçməyi tövsiyə edirlər.
Sunay Aydın
