Böyük Britaniyada fəaliyyət göstərən populyar LBC radiostansiyasının canlı yayımı zamanı ciddi proqram və texniki xəta baş verib. Radiostansiya ölkə monarxı Kral III Çarlzın vəfat etdiyini elan edərək onun xatirəsinə aid xüsusi proqramı yayımlayıb.
AzPost xəbər verir ki, hadisə axşam saatlarında, aparıcı Şelagh Foqartinin tok-şousu zamanı qeydə alınıb. Canlı yayım qəfildən kəsilərək efirə monarxın ölümü ilə bağlı əvvəlcədən hazırlanmış nekroloq və xüsusi matəm musiqisi verilib. Təxminən yarım dəqiqə davam edən bu anonsdan sonra yayım yenidən kəsilib və qısa sükutdan sonra aparıcı proqramı davam etdirib.
Aparıcı baş vermiş insidentə görə dinləyicilərdən üzr istəyərək bunun texniki bir səhv olduğunu bildirib:
“Xanımlar və cənablar, proqramımızda texniki xəta baş verdi. Biz tamamilə fərqli bir audionu efirə verdik. Yarana biləcək hər hansı narahatlığa və çaşqınlığa görə dərin üzrümüzü qəbul edin.”
Qeyd edək ki, Böyük Britaniyanın bütün aparıcı media qurumlarında monarxların və kral ailəsinin digər yüksək rütbəli üzvlərinin vəfatı halı üçün öncədən hazırlanmış protokollar və audio-video materiallar (nekroloqlar) mövcud olur. LBC radiosunda baş verən hadisənin də məhz daxili sistemdəki texniki nasazlıq səbəbindən həmin arxiv materialının səhvən işə düşməsi nəticəsində qaynaqlandığı bildirilir. Bukingem sarayı məsələ ilə bağlı hələlik rəsmi şərh verməyib.
