Bu həftə Milli Məclisin ilk iclası keçiriləcək –

Yeni tərkib
09 Mart 2020 - 10:09

Bu həftə yeni çağırış Milli Məclisin ilk iclası keçiriləcək.

Azpost.info bildirir ki, bu barədə deputat Erkin Qədirli bildirib. Onun sözlərinə görə, ilk iclasın keçiriləcəyi gün hələ ki, dəqiqləşməyib.

Qaydaya görə, Konstitusiya Məhkəməsi parlament seçkilərinin nəticələrini təsdiqlədiyi gündən etibarən bir həftə müddətində yeni çağırış parlament ilk iclasına toplanmalıdır.

Bunun üçün ən son gün martın 12-nə düşür.

Qeyd edək ki, martın 5-də Konstitusiya Məhkəməsi Milli Məclisə növbədənkənar seçkilərin nəticələrini təsdiqləyib. Fevralın 9-da keçirilən seçkilərlə əlaqədar 33 saylı Xətai Birinci, 35 saylı Xətai Üçüncü, 74 saylı Lənkəran Kənd və 80 saylı İmişli-Beyləqan Seçki dairələrinin nəticələri etibarsız sayılıb.

Konstitusiya Məhkəməsi buna görə də 121 nəfərin deputatlığını təsdiq edib.

Ümumilikdə 125 seçki dairəsi üzrə 87 seçki məntəqəsi buraxılıb, 328-nin isə nəticələri ləğv edilib.