Donald Trampın bu ilin yanvarında vəzifəyə gəlişindən bəri 515 mindən çox qeyri-leqal miqrant ABŞ-dan deportasiya edilib.
Bu barədə “Fox News” telekanalı Milli Təhlükəsizlik Departamenti katibinin köməkçisi Trisia Maklaflinə istinadla məlumat yayıb. Maklaflinin sözlərinə görə, deportasiya edilənlərin sayının Trampın hakimiyyətdə olduğu ilk ilin sonuna qədər (20 yanvar 2026-cı il) rekord həddə – 600 min nəfərə çatacağı gözlənilir. O, həmçinin ilin əvvəlindən bəri 2 milyondan çox miqrantın ABŞ-ı tərk etdiyini, onlardan təxminən 1,6 milyon nəfərin öz istəyi ilə getdiyini açıqlayıb.
Donald Tramp daha sərt immiqrasiya siyasətinin tərəfdarı olduğunu dəfələrlə bildirib. O, Amerika tarixində qeyri-leqal miqrantların ən böyük deportasiya əməliyyatını həyata keçirmək niyyətindədir. Bununla yanaşı, Tramp administrasiyası ABŞ-dan deportasiya olunan miqrantları qəbul etmələri üçün üçüncü ölkələrə təzyiqləri davam etdirir.
