Yarımkeçiricilərə və elektron məhsullara tələbatın azalması fonunda “Samsung Electronics”in əməliyyat mənfəəti dördüncü rübdə təxminən 70 faiz azalaraq 8 illik minimuma düşüb.
Azpost.info xəbər verir ki, bu barədə “Financial Times” məlumat yayıb.
Mənfəətin azalması qlobal iqtisadiyyatın zəifləməsi ilə bağlıdır ki, bu da çiplərin qiymətlərinin aşağı düşməsinə və onlara tələbatın azalmasına səbəb olub.
Dünyanın ən böyük yaddaş çipləri, smartfonlar və televizorlar istehsalçısı bildirib ki, onun çiplərinə tələbatın azalması və onların ucuzlaşması gözləniləndən çox olub. İstehlakçıların “Samsung” telefonlarına marağı da azalıb.
“Uzun sürən makroiqtisadi problemlər nəticəsində yaranan zəif tələb səbəbindən smartfon satışları və gəlirləri azalıb”, – şirkətin açıqlamasında bildirilir.
Korporasiyanın məlumatına görə, onun əməliyyat gəliri ötən üç ayda bir il əvvəllə müqayisədə 69 faiz azalaraq 3,4 milyard dollar olub. Bu da 2014-cü ilin üçüncü rübündən bəri qazancda ən böyük azalmadır.
Azpost.info
