Yeni növ koronavirusun (COVID-19) EG.5 və ya “eris” adlandırılan variantının əsas əlamətləri yüksək hərarət, öskürək, burun axıntısı, tənəffüs çətinliyi hesab olunur. Onun yoluxuculuğu daha yüksəkdir. Son günlər xüsusilə Türkiyə, Amerika Birləşmiş Ştatları, Çin, Böyük Britaniya və Avropanın bir sıra ölkələrində yoluxma saylarında artım var. Lakin mütəxəssislərin dediyinə görə, ölkəmizdə müşahidə olunan xəstəliklər mövsümlə əlaqədardır.
Həkim-terapevt Sevinc Zeynalova deyib: “Hazırda ölkəmizdə rast gəlinən virus hər il üzləşdiyimiz virusdur. Yüngül keçir, xəstələrdə üç gündən artıq hərarət olmur. Kataral əlamətlər – asqırma, burun axıntısı və boğaz ağrısı halları baş verir, bəzi xəstələrdə ishal olur. Lakin onun Türkiyədə yayılan virusla heç bir əlaqəsi yoxdur, çünki orda yayılan virus daha ağır keçir. Dəridə xırda səpgilər olur, dəyişikliklər baş verir, ürəyin ritmi pozulur, əzələ zəifliyi yaradır. Azərbaycanda hələ həmin virusun əlamətlərinə rast gəlinməyib”.
İmmun sistemi zəif olanlar, yanaşı xəstəliyi olanlar daha diqqətli olmalıdırlar. Həkimlər məsləhət görürlər ki, toplam və tünlük olan yerlərdə mümkün qədər az olmaq və başqaları ilə ünsiyyət zamanı sosial məsafəni qorumaq lazımdır. Bu kimi hallarla rastlaşanda və özünü narahat hiss edəndə həkimə üz tutmaqdan çəkinmək lazım deyil.
Virusun uşaqlar arasında yayılmasına gəlincə, həkimlər valideynləri təşvişə düşməməyə çağırır. Həkim-pediatr Səadət Əzimovanın mövqeyi belədir: “Hər temperatur yüksələn zaman və ya hansısa respirator əlamətlər olan kimi dərhal antibiotiklərdən istifadə etməmək lazımdır. Ən yaxşısı immun sistemini gücləndirmək üçün təbii vasitələrdən istifadə etməkdir. Valideynlər uşağın açıq havada daha çox gəzintisini təşkil etməli, gigiyenik qaydalara riayət olunmasını izləməli, vitaminlərlə zəngin olan meyvə-tərəvəzlərdən ibarət qida rasionu seçmək qayğısına qalmalıdırlar”.
Tibbi Ərazi Bölmələrini İdarəetmə Birliyindən (TƏBİB) koronavirusun yeni variantı ilə bağlı əhaliyə xəbərdarlıq edilib. Qeyd edilib ki, yeni ştam sürətlə yayıldığı üçün tezliklə Azərbaycanda da aşkarlana bilər. Lakin təlaşa düşmək üçün hər hansı əsas yoxdur. Ölkəmizdə vəziyyət kifayət qədər stabildir. Virusun dalğası ölkəmizə çatmasa da, onun sonralar da gəlməyəcəyi istisna edilmir. Ona görə də ilk növbədə şəxsi gigiyena qaydalara əməl olunmalıdır(azərtac).
