oğurluq
Cəlilabadda sahibkarın bacısı oğlu azadlığın məhdudlaşdırılması ilə cəzalandırıldı.
Cəlilabad rayonunda qeyri-adi oğurluq hadisəsi baş verib. AzPost xəbər verir ki, “Rizvan” ticarət mərkəzində ərzaq satışı ilə məşğul olan sahibkar İlyas adlı şəxsin evindən 1 min doqquz yüz manat pul oğurlanıb. Araşdırma nəticəsində məlum olub ki, oğurluq hadisəsini onun bacısı oğlu – 1987-ci il təvəllüdlü Səid törədib.
İstintaq materiallarına əsasən, Səid mənzilə qanunsuz daxil olaraq pulları ələ keçirib və daha sonra taksi ilə Masallı rayonuna gedərək restoranların birində yeyib-içib. Tanımadığı taksi sürücüsünə qırx manat, restoranda isə altmış beş manat xərclədiyini bildirib. O, dayısının polisə müraciət etdiyini öyrəndikdən sonra izləri gizlətmək məqsədilə qalan pulu selofan torbaya qoyaraq tualetə atıb.
Hadisə ilə bağlı Cinayət Məcəlləsinin 177.2.3-cü (mənzilə qanunsuz daxil olmaqla oğurluq törətmək) maddəsi ilə iş açılıb və məhkəməyə göndərilib.
Məhkəmənin hökmünə əsasən, Səid təqsirli bilinib və ona iki il dörd ay on gün müddətində azadlığın məhdudlaşdırılması cəzası verilib. Bu müddət ərzində o, elektron qolbaqla nəzarətdə saxlanılacaq.
