2026-cı ilin ilk altı ayında Azərbaycan Mərkəzi Bankının keçirdiyi valyuta hərraclarında satılan ABŞ dollarının həcmi əvvəlki illərlə müqayisədə kəskin azalıb.
Bu barədə iqtisadçı ekspert Natiq Cəfərli sosial şəbəkə hesabında paylaşım edib.
Onun sözlərinə görə, cari ilin yanvar-iyun aylarında keçirilən valyuta hərraclarında cəmi 757 milyon ABŞ dolları satılıb. Müqayisə üçün, 2025-ci ilin eyni dövründə bu göstərici 2,7 milyard ABŞ dolları, 2024-cü ilin ilk yarısında isə 3,5 milyard ABŞ dolları olub.
Ekspert hesab edir ki, dollara tələbin azalması ilk baxışda müsbət görünsə də, əslində bunun arxasında iqtisadi fəallığın zəifləməsi dayanır. “Dollara tələbat düşüb, çünki iqtisadi aktivlik azalıb, ÜDM artımı 0 faiz civarındadır. Dollara tələbin kəskin azalması yaxşı gedişat deyil”, – deyə Natiq Cəfərli bildirib.
Onun fikrincə, idxalın azalması da əhalinin alıcılıq qabiliyyətinin zəifləməsi ilə bağlıdır. Ekspert qeyd edib ki, qiymətlərin yüksək qalması və real gəlirlərin artım tempinin aşağı olması insanların alış imkanlarını məhdudlaşdırır.
Natiq Cəfərli hökumətin iqtisadi siyasətini də tənqid edərək bildirib ki, əsas problemə yanaşma düzgün deyil.
Onun sözlərinə görə, hökumət büdcə gəlirlərinin azalmasını kompensasiya etmək üçün biznesin və vətəndaşların maliyyə yükünü artırmağa çalışır. Bu isə əks nəticə verir və iqtisadi fəallığın daha da zəifləməsinə səbəb olur. “Əsas hədəf iqtisadiyyatı canlandırmaq olmalıdır. Bütün qərarlar bu istiqamətdə qəbul edilməlidir. O zaman büdcə gəlirləri də artacaq. İndiki yol iqtisadiyyatı boğur”, – deyə ekspert vurğulayıb.
