Alimlər ABŞ-da yerləşən və “Metuşelah” adlandırılan ağacın Yer üzündəki ən qədim canlılardan biri olduğunu bildirirlər.
Azpost.info bildirir ki, Kaliforniyanın Ağ Dağlarında yerləşən bu qədim şam ağacının yaşı təxminən 4850 il hesab edilir. O, Misir piramidalarının tikilməsindən əvvəl cücərib.
Ağacın dəqiq yeri gizli saxlanılır. Bunun səbəbi turist axınının ona zərər verə biləcəyi ilə bağlı narahatlıqlardır. ABŞ Meşə Xidmətinin əməkdaşları hesab edir ki, hətta insanların ağacın kökləri ətrafında çox gəzməsi belə onun həyatına təhlükə yarada bilər.
Dendroloqlar bildirirlər ki, bu ağacın uzunömürlü olmasının sirri yaşadığı sərt iqlim şəraitindədir. Güclü küləklər, az yağıntı və qida maddələrinin məhdudluğu ağacın çox yavaş böyüməsinə səbəb olub. Məhz bu xüsusiyyət onun minilliklər boyu yaşamasına imkan yaradıb.
Mütəxəssislər hesab edirlər ki, Metuşelah insan sivilizasiyasının yaranması və inkişafının canlı şahidlərindən biridir. Bu ağac mövcud olduğu müddətdə onlarla imperiyanın yaranıb dağılmasına “şahidlik edib”.
S.Aydın
