“Siyasi partiyalar haqqında” qanunun qəbulunun səbəbi Azərbaycanda yeni sistem formalaşdırmaq və Azərbaycanın demokratik dövlət kimi güclənməsinə böyük töhfədir.
Bunu Demokratik İslahatlar Partiyasının sədri, deputat Asim Mollazadə Milli Məclisdə İctimai birliklər və dini qurumlar, Hüquq siyasəti və dövlət quruculuğu komitəsi və İnsan hüquqları komitələrinin birgə iclasında “Siyasi partiyalar haqqında” qanun layihəsinin müzakirəsi zamanı bildirib.
A.Mollazadə bildirib ki, müəyyən məqamlar var ki, qanun tərəfindən həm partiya yaradıcılarına, həm də partiyada siyasi fəaliyyətlə məşğul olan şəxslərə məhdudiyyət qoyulur: “Məsələn, dini ekstremizmin və dini faktorun siyasətdən kənarlaşdırılması kimi. Bu, bir ehtiyacdır. Xarici dövlətin Azərbaycanın siyasi sisteminə hansısa Vardanyanlar, Medvedçuklar gətirməsinə imkan verməmək, zənnimcə çox məntiqlidir və zəruridir”.
Deputat əlavə edib ki, dövlətin partiya fəaliyyətinə müdaxiləsinin qarşısı alınmalıdır: “Bunlara ehtiyac varmı? Düşünürəm ki, bütün məhdudiyyətlər ciddi şəkildə azaldılmalı və ya qanundan çıxarılmalıdır”.
