Britaniyalı musiqiçi, gitara ifaçısı və əfsanəvi rok qrupu The Yardbirds-in qurucularından biri olan Kris Drea səksən yaşında dünyasını dəyişib.
AzPost xəbər verir ki, musiqiçinin vəfatı barədə məlumatı Deadline nəşri yayıb.
Onun ölüm xəbərini musiqiçinin ailə üzvləri də təsdiqləyib. Drea uzun müddətdir səhhətində problemlər yaşayırdı. Lakin ailəsi ölüm səbəbini dəqiqləşdirməyib.
Kris Drea 1945-ci ilin noyabrında İngiltərənin Surrey qraflığında anadan olub. Gənclik illərində dostu Entoni Topham ilə birgə müxtəlif musiqi qruplarında çıxış edib. 1963-cü ildə onlar birlikdə The Yardbirds qrupunu təsis ediblər. Drea burada ritm gitarada ifa edirdi.
Qrupun əsas heyətinə həmçinin zərb ifaçısı Cim Makkarti və bas gitarist Pol Semvell-Smit daxil idi. Bu kollektiv dünya rok tarixində xüsusi yer tutub. Çünki burada ardıcıl olaraq üç böyük gitara ustası – Erik Klepton, Cef Bek və sonradan Led Zeppelin-ə qoşulan Cimmi Peyc çıxış ediblər.
“The Yardbirds” 1965-ci ildə “For Your Love” albomu ilə beynəlxalq şöhrət qazanıb. Həmin il işıq üzü görən “Having a Rave Up with the Yardbirds” albomu da qrupun uğurunu möhkəmləndirib.
Kollektiv 1968-ci ildə fəaliyyətini dayandırsa da, onun rok musiqisinə təsiri bu gün də davam edir. Kris Drea isə musiqi tarixində özünəməxsus iz qoyan sənətçilərdən biri kimi xatırlanır.
