Ermənistanda saxlanılan Azərbaycan vətəndaşı, hərbçi Nəsimi Rəhim oğlu Musayevin cinayət işi Gorus Məhkəməsinə göndərilib.
Ermənistan mediasının məlumatına görə, iş Sünik vilayət məhkəməsinin hakimi Qraç Dacuntsun icraatına verilib. Bu barədə “NEWS.am”a “Datalex” məhkəmə informasiya sistemindən məlumat verilib.
İttiham aktına əsasən, Nəsimi Musayev 2026-cı il yanvarın 28-dən Azərbaycan Silahlı Qüvvələrinin N saylı hərbi hissəsində müddətli həqiqi hərbi xidmətdə olub. Xidməti zamanı onun sərəncamında 1961-ci ildə istehsal edilmiş, zavod nömrəsi MM 5087 olan “AKM” avtomatı, 7,62 millimetrlik 140 döyüş və 10 boş patron, həmçinin bir süngü-bıçaq olub.
İttihama görə, N.Musayev 2026-cı il sentyabrın 26-da Azərbaycanın Laçın rayonu ərazisində yerləşən döyüş mövqeyində xidmət apararkən Ermənistanın Sünik vilayətinin İşxanasar yaşayış məntəqəsinin inzibati ərazisindən keçərək ölkənin dövlət sərhədini qanunsuz keçib. O, bununla yanaşı, gömrük nəzarətindən keçirmədən avtomatı, döyüş sursatlarını və süngü-bıçağı da Ermənistan ərazisinə keçirib.
Daha sonra N. Musayev Sünik vilayətinin Sisian icmasına daxil olan Şəki kəndinə gəlib. İttihamda bildirilir ki, sentyabrın 30-dan oktyabrın 1-dək kəndin 6-cı küçəsində yerləşən 20 nömrəli evə sakinlərin iradəsinə zidd olaraq qanunsuz daxil olub.
O, evdən 12 min dram dəyərində “Xiaomi” markalı mobil telefon, 5 min dram dəyərində ağıllı saat və bir şalvar götürüb. Qonaq otağından 9 min dram və bir bank kartı, evin giriş qapısının qarşısından isə müxtəlif cütlərə aid iki sol ayaqqabı götüürüb.
İttihama əsasən, 2026-cı il oktyabrın 1-də həmin evdə yaşayan azyaşlı Rozi və Kadjik Avetisyan evə qayıdıblar və N. Musayevi mənzildə görüblər. N.Musayev onları qonaq otağındakı divanda oturdub.
Qızı Rozi ilə telefon danışığından evdə silahlı şəxsin olduğunu öyrənən Ani Avetisyan mənzilə gəlib.
İttihamda iddia olunur ki, N. Musayev avtomatdan altı dəfə atəş açıb. Güllələrdən biri Ani Avetisyanın sol bud nahiyəsinə dəyərək deşici odlu silah yarası törədib.
Hadisədən sonra N.Musayev hadisə yerindən qaçaraq Şəki kəndinin 6-cı küçəsindəki 26 nömrəli evin yaxınlığında yerləşən tövlədə gizlənib. O, həmin gün saat 16:15-də hüquq-mühafizə orqanlarının əməkdaşları tərəfindən aşkar edilərək saxlanılıb.
Cinayət işi üzrə məhkəmə prosesi Gorus Məhkəməsində keçiriləcək.
