Vatikanın yüksək vəzifəli rəsmisi kardinal Pietro Parolin ABŞ prezidenti Donald Trampın fələstinlilərin Qəzza zolağından çıxarılması təklifini rədd edərək, “Fələstinlilər öz vətənlərində qalmalıdır” deyib.
AzPost bildirir ki, kardinal Parolin İtaliya və Vatikan rəsmiləri arasında görüş zamanı bildirib.
“Bu, Müqəddəs Taxt-tacın əsas məqamlarından biridir: Heç bir deportasiya ola bilməz” – deyə kardinal Parolin bildirib.
Vatikan sözçüsü deyib ki, fələstinlilərin qovulması məntiqli deyil və regional gərginliyə səbəb olacaq. Kardinal xatırladıb ki, İordaniya kimi qonşu ölkələr Trampın Qəzzanın etnik təmizləmə planına qarşı çıxır. “Bizim fikrimizcə, həll yolu iki dövlət yaratmaqdır” deyə Parolin yekunlaşdırıb.
Xatırladaq ki, İspaniyanın baş naziri Pedro Sançes ABŞ prezidenti Donald Trampın fələstinliləri Qəzza zolağından zorla çıxarmaq planını qınayır.
Sançesin sözlərinə görə, İspaniya Trampın Qəzza ilə bağlı planının həyata keçirilməsinə icazə verməyəcək.
İspaniyanın baş naziri dünyanın hər yerində olduğu kimi Qəzza zolağında da beynəlxalq hüquqa, xüsusilə humanitar hüquqa hörmətlə yanaşmağa çağırıb.
“Fələstinlilər Fələstində, israillilər isə İsraildə sülh, və təhlükəsizlik şəraitində yaşamalıdırlar”,- deyə o qeyd edib.
