Gecə yuxusunun az olması sağlamlıq üçün risk yarada bilər. Lakin yeni böyük araşdırma yalnız yuxusuzluğa deyil, həddindən artıq yatmağa da diqqət çəkir.
Təxminən 500 min insanın məlumatlarının araşdırıldığı tədqiqatda 37–84 yaş arası şəxslərin yuxu müddəti və sağlamlıq göstəriciləri müqayisə edilib.
Nəticələrə görə, gecə 6 saatdan az yatanlarda bütün səbəblərdən ölüm riski 6–8 saat yatanlarla müqayisədə daha yüksək olub. Eyni zamanda 8 saatdan çox yatanlarda da riskin artdığı müşahidə edilib.
Araşdırmada 6–8 saatlıq yuxu müddəti müqayisə üçün əsas qrup kimi götürülüb.
Mütəxəssislər bununla belə, nəticələrin “az yatmaq və ya çox yatmaq birbaşa ömrü qısaldır” mənasına gəlmədiyini vurğulayırlar. Çünki tədqiqat müşahidə xarakterlidir və digər sağlamlıq problemləri yuxu müddətinə də təsir göstərə bilər.
Bəs nəticə nədir?
Yuxuya yalnız “neçə saat yatdım?” sualı kimi baxmaq düzgün deyil. Yuxunun keyfiyyəti, müntəzəmliyi, gecə tez-tez oyanmaq və gündəlik həyatdakı digər amillər də əhəmiyyətlidir.
Bu səbəbdən davamlı yuxu problemi yaşayan şəxslər bunu sadəcə yorğunluq kimi qəbul etməməli və həkimlə məsləhətləşməlidir.
