Yəmənin şimalında hakimiyyətdə olan şiə hərbi-siyasi hərəkatı “Ənsar Allah” (husilər) Bab əl-Məndəb boğazı yaxınlığında və Qırmızı dənizin qərb sahilində yerləşən bütün əsas yaşayış məntəqələrinə nəzarəti ələ keçirib. Bu barədə hərbi mənbə məlumat verib.
Mənbənin sözlərinə görə, husilər hökumət qüvvələrinin geri çəkilməsindən sonra boğazın ən dar hissəsində yerləşən strateji əhəmiyyətli Perim (Mayun) adasını ələ keçiriblər. Ada Dubab rayonuna daxildir. Husilər həmçinin adaya nəzarət edən Az-Zəafur sahilini də tutublar. Yəmən ordusunun bölmələri adanın cənub hissəsinə geri çəkilib.
Bundan başqa, mənbə bildirib ki, husilərin katerləri Qırmızı dənizdəki Haniş arxipelaqına desant çıxarıb. Arxipelaqa Böyük Haniş, Kiçik Haniş və Cəbəl-Zukar adaları daxildir. Bu ərazi Hudeydə vilayətinə aiddir və Qırmızı dənizin cənub hissəsindəki mühüm gəmiçilik yollarına çıxışı var.
“Ənsar Allah”ın hərbi-dəniz qüvvələrinin Yəmən sahilindən təxminən 25 dəniz mili məsafədə yerləşən arxipelaqa nəzarəti tam ələ keçirdiyi təsdiqlənib. Mənbənin məlumatına görə, adalarda yerləşən 260 zabit və hərbçidən ibarət qarnizon əsir götürülüb. Təslim olmaq barədə radio vasitəsilə bir neçə saat davam edən danışıqlardan sonra hərbçilər Hudeydə sahilinə aparılıb.
Bu hadisə husilərin Taiz vilayətinin qərbində yerləşən strateji əhəmiyyətli Əl-Moha rayonunu, o cümlədən Bab əl-Məndəb boğazına çıxışı olan limanı ələ keçirməsindən sonra baş verib. Qruplaşma bundan əvvəl də ölkənin qərbində yerləşən Hudeydə vilayətinə nəzarəti möhkəmləndirib.
Husilər Yəməndə hökumət qüvvələrinə və Səudiyyə Ərəbistanına qarşı hərbi əməliyyatları iyulun ortalarından etibarən yenidən fəallaşdırıblar. Məlumata görə, bundan əvvəl dörd il ərzində belə genişmiqyaslı hərbi qarşıdurma baş verməyib. Döyüşlərin yenidən başlaması Səudiyyə Ərəbistanı Hərbi Hava Qüvvələrinin Səna hava limanına zərbələr endirməsindən sonra baş verib. Həmin vaxt İran təyyarəsi göyərtəsində husilərin nümayəndə heyəti ilə hava limanına enirmiş.
