İlk dəfədir ki, Yeni Azərbaycan Partiyasının (YAP) qurultayı Azərbaycanın ərazi bütövlüyünü və suverenliyini tam bərpa etməsindən sonra keçirilir.
Bu barədə YAP-ın Sədri, Prezident İlham Əliyev partiyanın VIII Qurultayında çıxışı zamanı bildirib.
Dövlət başçısı VII qurultayın da Azərbaycan üçün yeni siyasi və tarixi şəraitdə keçirildiyini xatırladıb. Onun sözlərinə görə, həmin qurultay 44 günlük İkinci Qarabağ müharibəsində qazanılan Zəfərdən cəmi bir neçə ay sonra keçirilmişdi.
Prezident qeyd edib ki, həmin dövrdə bütün dünya Azərbaycanın Zəfərindən danışırdı: “Azərbaycan özü təkbaşına həm işğala son qoymuşdur, eyni zamanda, bölgədə yeni reallıqlar yaratmışdır. O vaxtdan – İkinci Qarabağ müharibəsindəki Zəfərimizdən bu günə qədər bu reallıqlar bütün dünya tərəfindən qəbul edilir”.
“YAP-ın yaradılması xalqın tələbi idi”
İlham Əliyev YAP-ın yaradılması ilə bağlı da fikirlərini bölüşüb.
“Yeni Azərbaycan Partiyasının yaradılması, yenə də deyirəm, xalqın tələbi idi”, – Prezident bildirib.
Dövlət başçısı Heydər Əliyevin yenidən hakimiyyətə qayıdışının da xalqın tələbi olduğunu vurğulayıb. Onun sözlərinə görə, Heydər Əliyev həmin dövrdə Azərbaycanda olsaydı, ölkədə baş verən hadisələrin qarşısının alınmasına çalışardı.
“Əgər Heydər Əliyev o vaxt Azərbaycanda olsaydı, heç vaxt imkan verə bilməzdi ki, Azərbaycan xalqının başına bu oyunlar açılsın, heç vaxt imkan verməzdi ki, separatizm meylləri Qarabağda yer alsın”, – İlham Əliyev deyib.
Prezident bildirib ki, Azərbaycan xalqı bütün bunları yaxşı bildiyi üçün öz nicat yolunu Heydər Əliyevlə bağlayırdı.
“Bir gün belə istirahət etmədik”
İlham Əliyev çıxışında 2020-ci il Zəfərindən sonra qarşıya qoyulan əsas məqsədlərdən birinin Azərbaycanın ərazi bütövlüyünün tam bərpası olduğunu da diqqətə çatdırıb. “Bizim şanlı Zəfərimizdən sonra fəaliyyətimiz ərazi bütövlüyümüzün tam bərpasına istiqamətləndirilmişdi”, – Prezident deyib.
Dövlət başçısı bildirib ki, bu istiqamətdə fəaliyyət dayandırılmayıb: “Bir gün belə ara vermədik, bu şərəfli missiyamızın həyata keçirilməsində bir gün də istirahət etmədik”.
Onun sözlərinə görə, İkinci Qarabağ müharibəsindən 2023-cü ilin sentyabrında keçirilən antiterror əməliyyatına qədər Azərbaycan bir neçə istiqamətdə fəaliyyət göstərib.
Beləliklə, Prezidentin çıxışında YAP-ın VIII Qurultayının Azərbaycanın ərazi bütövlüyü və suverenliyinin tam bərpa edildiyi yeni mərhələdə keçirildiyi, 2020-ci il Zəfərindən sonra qarşıya qoyulan hədəflər və YAP-ın yaranması ilə bağlı hakimiyyətin siyasi mövqeyi əsas mesajlar kimi önə çıxıb.
