Neft və milyonlar səltənəti
Azərbaycan kinosunun tarixi rəsmi olaraq 1916-cı ildən başlayır. AzPost.az xəbər verir ki, həmin il çəkilən “Neft və milyonlar səltənəti” filmi ölkə kino tarixində ilk tammetrajlı bədii film kimi tarixə düşüb. Film məşhur yazıçı İbrahim bəy Musabəyovun eyniadlı romanı əsasında ekranlaşdırılıb.
Filmin çəkilişlərinə 1915-ci ildə Bakı şəhərində start verilib. Çəkilişləri dövrün tanınmış rus rejissoru Boris Svetlov həyata keçirib. Layihənin əsas maliyyə dəstəyini isə dövrün varlı neft maqnatlarından olan Məşədi Ələsgər Məlikov verib. Bu, həm də ilk dəfə yerli kapitalın Azərbaycan kinosuna sərmayə yatırması faktı kimi yadda qalıb.
“Neft və milyonlar səltənəti” filmi Bakı neft maqnatlarının həyatını, zəngin və kasıb təbəqə arasındakı sosial fərqləri əks etdirən süjet xətti ilə diqqət çəkib. Filmin əsas rollarında Hüseyn Ərəblinski, Sidqi Ruhulla və Əliqulu Qəmküsar kimi dövrün məşhur teatr aktyorları çəkilib.
Çəkilişlər əsasən Bakının İçərişəhər və Qala ərazisində aparılıb. Filmin maraqlı məqamlarından biri isə odur ki, bəzi kadrlar neft mədənlərində, real istehsalat meydançalarında lentə alınıb. Bu isə o dövr üçün çox nadir və çətin icra olunan texniki iş sayılırdı.
Film 1916-cı ilin aprel ayında Bakının “Forum” kinoteatrında nümayiş etdirilib və tamaşaçılar tərəfindən böyük maraqla qarşılanıb. Kino tarixçilərinin fikrincə, “Neft və milyonlar səltənəti” filminin çəkilişi Azərbaycan mədəniyyətində və kino sənayesində əlamətdar hadisə sayılır.
Bu ekran işi ilə Azərbaycan Şərqdə ilk bədii film çəkən ölkələrdən biri kimi tarixə düşüb. Film hazırda Azərbaycan Dövlət Film Fondunda saxlanılır və milli kino irsimizin dəyərli nümunəsi hesab olunur.
