süni intellekt
Forbes nəşri yazır ki, İlon Maskın hazırladığı Grok adlı süni intellektlə aparılan üç yüz yetmiş mindən çox istifadəçi söhbəti internetdə açıq şəkildə yayılıb.
AzPost bildirir ki, bu məlumatlar xüsusi platformada yerləşdirildikdən sonra axtarış sistemlərinin indeksinə düşərək ictimaiyyətə açıq olub.
Yayılmış materiallar arasında təkcə mətn yazışmaları deyil, həm də istifadəçilərin yüklədiyi şəkillər, cədvəllər və müxtəlif sənədlər də yer alıb. İnsidentin səbəbi kimi Grok-un “Share” funksiyası göstərilir. Bu funksiya istifadəçilərə söhbəti paylaşmaq üçün unikal link təqdim edir, lakin həmin linklər axtarış sistemlərində görünməyə başlayıb. Sistem isə istifadəçiləri bu barədə xəbərdar etməyib.
Forbes yazır ki, sızan dialoqlarda şəxsi məlumatlar, sağlamlıqla bağlı həssas detallar, psixoloji vəziyyət haqqında qeydlər, hətta bəzi hallarda giriş kodları da aşkar edilib. Bundan əlavə, qanunsuz kontent yaratmaqla bağlı sorğular – qadağan olunmuş maddələrin sintezi, dağıdıcı proqram təminatı və partlayıcı maddələrin hazırlanması barədə təlimatlar da üzə çıxıb.
Mütəxəssislər qeyd edir ki, bu cür hallar süni intellekt texnologiyalarında təhlükəsizlik və məxfilik məsələlərinin nə qədər aktual olduğunu bir daha göstərir. Maraqlıdır ki, yay aylarında digər İA platformalarında, o cümlədən ChatGPT-də də oxşar presedentlər qeydə alınmışdı. Lakin həmin vaxt istifadəçilərin razılığı olmadan söhbətlərin dərc olunması baş verməmişdi.
