İranın neft naziri Cavad Ovci Türkiyəyə səfər edib.
Azpost.info Mehr Agentliyinə istinadən bildirir ki, İranlı nazir Türkiyənin iqtisadiyyat və energetika sahəsindəki rəsmi şəxslərlə görüşüb.
Ankaraya gələn Cavad Ovcinin Türkiyənin energetika və iqtisadiyyat nazirləri Fateh Dönmez və Nureddin Nebati ilə görüşündə əsas müzakirə qaz sazişi ilə bağlı olub. Tərəflər İrandan Türkiyəyə qaz ixracı ilə bağlı sazişin uzadılmasını müzakirə ediblər. Hazırkı qaz müqaviləsinin müddəti 2026-cı ildə başa çatır. Müqavilə 2001-ci ildə imzalanıb.
Tərəflər İrandan Türkiyəyə verilən qazın həcminin artırılmasını və yeni qaz kəmərinin tikintisini də müzakirə ediblər. Yeni qaz kəməri bu marşrut üzrə göndərilən qazın buraxılış həcmini artırmaq üçündür.
Müzakirələr zamanı mühüm məsələlərdən biri türk şirkətlərinin və sərmayəçilərinin İranın enerji sektorunda kəşfiyyat işlərinə dəvəti olub. Danışıqlarda İran Türkiyəni enerji, neft-qaz və neft məhsulları ticarətində yeni müqavilələrin bağlanması və sərmayələrin qoyulması ilə bağlı yeni layihələrə dəvət edib.
Azpost.info
