İran və Oman arasında Hörmüz boğazında gəmiçiliyin təhlükəsizliyinin təmin edilməsi ilə bağlı danışıqlarda son həftələrdə ciddi irəliləyiş əldə olunub. Tərəflər gəmilərin hərəkəti üçün istifadə ediləcək marşrutun xəritəsi üzrə razılığa gəliblər.
İran və Oman Hörmüz boğazında yeni marşrut üzrə razılaşdı
Son üç həftə ərzində İran və Oman arasında Hörmüz boğazı ilə bağlı danışıqlarda irəliləyiş əldə olunub.
Bu barədə İran Xarici İşlər Nazirliyinin sözçüsü İsmayıl Bəqai açıqlama verib.
Onun sözlərinə görə, İran və Oman arasında danışıqlar təxminən iki-üç ay əvvəl başlayıb. Son üç həftədə isə prosesdə mühüm irəliləyiş əldə olunub.
Tərəflər Hörmüz boğazından keçəcək gəmiçilik marşrutunun xəritəsi üzrə razılığa gəliblər. Danışıqların əsas məqsədi hər iki istiqamətdə gəmilərin təhlükəsiz hərəkətini təmin edəcək marşrutların müəyyənləşdirilməsidir.
Bəqai bildirib ki, İran və Oman arasında yayımlanması nəzərdə tutulan birgə bəyanatla bağlı müzakirələr hələ davam edir. Sənəd yekunlaşdırıldıqdan sonra onun məzmununun ictimaiyyətə açıqlanacağı gözlənilir.
İran rəsmisi növbəti mərhələdə baş verəcək proseslərin digər amillərdən asılı olacağını da vurğulayıb.
Qeyd edək ki, Hörmüz boğazı dünya enerji bazarı üçün strateji əhəmiyyət daşıyan əsas dəniz keçidlərindən biridir. Reuters-in məlumatına görə, boğazdan əvvəlki dövrdə dünya neft və mayeləşdirilmiş təbii qaz daşımalarının təxminən beşdə biri keçirdi. İranın açıqlamasına görə isə yeni gəmiçilik marşrutu üzrə razılaşma boğazın açılması üçün zəruri şərtlərdən biridir, lakin bunun üçün əlavə məsələlərin də həll olunması tələb olunur.
