Benzin
İranda güzəştsiz satılan benzinin qiyməti iki dəfə artırılıb. Sentyabrın 8-dən etibarən üçüncü tarif üzrə benzinin bir litri 10 min tümənə satılır.
Azpost.info bildirir ki, İran Neft Nazirliyinin məlumatına görə, dəyişiklik yalnız güzəştli limitləri aşan istehlaka şamil olunur.
Üçüncü tarif 2025-ci ilin sonunda tətbiq edilmişdi və həmin vaxt bu kateqoriya üzrə benzinin qiyməti litrə 5 min tümən idi. Yeni qərarla qiymət 10 min tümənə çatdırılıb.
Bununla yanaşı, ilk iki güzəştli tarif dəyişdirilməyib. İstehlakçılar ay ərzində ilk 60 litr benzini 1,5 min tümən, növbəti 50 litri isə 3 min tümən qiymətinə ala bilirlər. 110 litrlik güzəştli limitdən sonrakı yanacaq isə yeni tariflə hesablanacaq.
İran hökuməti qərarın yüksək yanacaq istehlakı və ölkədə yaranmış tələb-təklif balanssızlığı fonunda qəbul edildiyini bildirir. Benzinin qiymətinin artırılması ölkədə iqtisadi təzyiqlərin və yanacaq təminatı ilə bağlı problemlərin artdığı dövrə təsadüf edir.
