“Əvvəlki siyasi partiyalar indi yoxdur. Müxalifət həddən artıq zəifdir. İqtidar özü də siyasi müstəvidə müxalifətlə mübarizə aparmır”.
Bu sözləri Azpost.info-ya müsahibəsində Azərbaycan Demokrat Partiyasının sədri Sərdar Cəlaloğlu müxalifətdaxili əməkdaşlıq perspektivlərini şərh edərkən bildirib.
Onun sözlərinə görə, hazırda partiyalar arasındakı münasibətlər birmənalı deyil: “Məsələn, özünü radikal adlandıran qüvvələr var ki, onlar hakimiyyətlə dialoqda olan partiyalara az qala düşmən münasibəti göstərirlər. Ona görə də müxalifət partiyalarının əməkdaşlığı barədə vəziyyət o qədər də ürəkaçan deyil”.
ADP sədri siyasi partiyaların güclü olmasının bir sra şərtlərdən asılı olduğunu vurğulayıb: “Müxalifətin güclənməsi ölkədəki çoxpartiyalı siyasi sistemin yaradılması ilə əlaqədardır. Elə bir sistem isə yoxdur. Nə Konstitusiyada çoxpartiyalı siyasi sistem təsbit olunur, nə də ölkədəki seçki qanunu və digər proseslər partiyaların inkişafına imkan yaradır. Partiyalar bu gün öz mövcudluqlarını saxlamaq uğrunda mübarizə aparmaqla məşğuldurlar. Proporsional seçki sistemi olsaydı, vətəndaşların partiyaların işində iştirak etməyə marağı olardı”.
S.Cəlaloğlu “partiyalara yeni simalar başılıq etməlidir” çağırışını da məqbul saymır: “Əgər liderlərin rəhbərlikdən getməsi inkişafa səbəb olsaydı, təşkilatın güclənməsinə səbəb olmuş olsaydı, o zaman iradlarda haqlı ola bilərdilər. Amma ortalıqda çox pis təcrübə var ki, bir neçə partiyanın lideri sədrlikdən gedəndən sonra həmin partiya dağılıb, zəifləyib, siyasi səhnədən yox olub. Məsələn, İsa Qəmbərin getməsi ilə Müsavat Partiyası demək olar ki, parçalandı, dağıldı, Etibar Məmmədovun getməsi ilə Azərbaycan Milli İstiqlal Partiyası dağıldı, Lalə Şövkətin getməsi ilə isə Azərbaycan Liberal Partiyası ümumiyyətlə, siyasi səhnədən silindi. Demək istəyirəm ki, liderlərin sədrlikdən getməsinin acı nəticələri gözümüzün qabağında ola-ola bu ideyanı gündəmə gətirmək düz deyil”.
Azpost.info
