İran-İsrail
Kanadada keçirilən G7 sammiti zamanı iştirakçı ölkələrin rəhbərləri İranın nüvə proqramı ilə bağlı ortaq mövqedə olduqlarını açıqlayıblar.
AzPost xəbər verir ki, Böyük Britaniyanın yeni baş naziri Kir Starmer sammit çərçivəsində jurnalistlərə bildirib: “Biz bununla bağlı müzakirə apardıq. G7-də birlik var. Nüvə proqramı ilə bağlı hər kəsin fikri aydındır. Biz bunu görmək istəmirik”.
İranla bağlı gərginlik fonunda ABŞ prezidenti Donald Tramp da sərt bəyanatla çıxış edib. O, “Truth” sosial platformasında yaydığı paylaşımda bildirib ki, İran nüvə sazişini imzalamalı idi: “Bu, biabırçılıq və insan tələfatıdır. Sadə dillə desək, İranın nüvə silahı ola bilməz. Mən bunu dəfələrlə demişəm! Hamı Tehranı dərhal tərk etməlidir”.
Tramp, İranın paytaxtını niyə boşaltmaq lazım gəldiyinə aydınlıq gətirməsə də, bu çağırış beynəlxalq səviyyədə narahatlıq yaradıb. Çinin İsraildəki səfirliyi də bölgədəki təhlükəsizliyin pisləşdiyini bildirərək, öz vətəndaşlarına İordaniya ilə sərhəddən istifadə edərək ölkəni quru yolla tərk etməyi tövsiyə edib. Səfirliyin “WeChat” hesabında yayımlanan bəyanatda qeyd olunub: “Hazırda İsrail və İran arasında münaqişə kəskinləşməkdə davam edir, bir çox mülki obyektə ziyan dəyib, mülki əhali arasında itkilərin sayı artmaqdadır”.
ABŞ prezidenti Trampın administrasiyası isə diplomatik kanallar vasitəsilə İran rəsmiləri ilə təmaslara çalışır. CNN-in yaydığı məlumata görə, Tramp komandasına mümkün qədər tez iranlı rəsmilərlə görüşməyə göstəriş verib. Məlumata əsasən, ilkin təmaslar vasitəçilərin iştirakı ilə artıq baş tutub.
Eyni zamanda, G7 çərçivəsində Avropa liderləri ilə apardığı söhbətlərdə Tramp İsrail və İran arasında atəşkəs əldə etmək üçün diplomatik cəhdlərin olduğunu vurğulayıb. O, Tehranın danışıqlara ciddi yanaşıb-yanaşmadığını müəyyənləşdirmək istədiyini bildirib.
