“İsveç və Finlandiyanın ən qısa zamanda alyansa qoşulmasını istəyirəm, lakin buna zəmanət verə bilmirəm”.
Azpost.info xəbər verir ki, “Politico” bunu NATO baş katibi Yens Stoltenberqə istinadən yazıb. “Mənim məqsədim İsveç və Finlandiyanın mümkün qədər tez NATO-ya daxil olmasını təmin etməkdir. Mən buna zəmanət verə bilmərəm, amma deyirəm ki, bu, hələ də mənim məqsədimdir”, – baş katib bildirib.
“Politico”ya görə, NATO baş katibi Türkiyənin etirazlarına baxmayaraq, iki ölkənin alyansa daxil olması ilə bağlı nikbinliyini qoruyur. “Bir və ya bir neçə NATO müttəfiqinin qalanları ilə razılaşmaması halı ilk dəfə deyil”, – Stoltenberq deyib. Finlandiya prezidenti Sauli Niinistö Türkiyə ilə fikir ayrılığı səbəbindən ölkəsinin sentyabr ayına qədər NATO-ya üzv olma ehtimalının olmadığını bildirib.
ABŞ hökuməti 28-30 iyunda Madriddə keçiriləcək NATO sammitinə qədər Finlandiya və İsveçin Türkiyə ilə razılığa gəlməsinə çalışır.
Azpost.info
