Kapital Bank
Kapital Bank-ın xidmətlərindən narazılıqlar sosial şəbəkələrdə və müştəri müraciətlərində artmaqdadır. AzPost-a daxil olan şikayətdə bildirilir ki, müştəri iyul ayının sonunda “cashback” kartı ilə soyuducu alıb, lakin alış-verişdən sonra kartına əlavə olaraq otuz səkkiz manat altmış dörd qəpik məbləğində sığorta borcu yazılıb. Bank həmin ödənişi 01 sentyabr 2025 tarixinədək ödəməyi tələb edib və vəsait müştəri tərəfindən ödənilib.
Problem bununla bitməyib. Müştəri 03 sentyabr tarixində eyni kartla marketdən xırda alış-veriş etdikdən sonra, həmin alış-verişin üzərinə yenidən sığorta ödənişi əlavə olunub. Bu isə istehlakçıda ciddi narazılıq yaradıb.
Şikayətçi qeyd edir ki, məsələ ilə bağlı bankın “chatbot” xidmətinə müraciət edib. Lakin cavab kimi yalnız hazır mesaj göndərilib: guya Phishing-Skimming və işsizlik sığortası illikdir və ildə bir dəfə tutulur. Müştəri isə haqlı olaraq bildirir ki, ödənişin üstündən bir həftə belə keçmədən eyni sığorta məbləği ikinci dəfə tutulub.
Paylaşılan şəkillərdə də görünür ki, kartın borc siyahısında “Phishing-skimming (dələduzluq)” üçün 27.30 AZN, işsizlik sığortası üçün 10 AZN, üstəlik market alış-verişləri ilə birlikdə yeni borc göstərilib. Halbuki, müştəri artıq əvvəlki ödənişi bağlamışdı.
Şikayətçi narazılığını sərt şəkildə ifadə edərək yazır: “Sizin kartınız da batsın, xidmətiniz də! Dələduzun böyüyü sizsiz! Əsas mühafizə sizdən lazımdır!”
Kapital Bank tərəfindən açıqlama təqdim edilərsə yazı yenilənəcək.
