Lənkəranda ötən əsrin əvvəllərində inşa olunan binada təhlükəli vəziyyət yaranıb.
APA-nın Cənub bürosunun verdiyi məlumata görə, çoxmənzilli binanın dam örtüyü dəyişilsə də, yağış yağan zaman yenə də evlərə su damır. Divarlarda çatlar əmələ gəlib, döşəmə tamamilə dağılıb. Döşəmənin qəzalı olmasına görə, sakinlərdən biri binanın zirzəmi hissəsinə düşüb və çoxsaylı xəsarət alıb.
Artıq aidiyyəti orqanların nümayəndələri binaya baxış keçiriblər. Binanın əsaslı təmirə əlverişsiz olduğu sayılıb və sakinlər üçün yeni binanın tikilməsi qərara alınıb.
Şəhər Mənzil Təsərrüfatı idarəsinin rəisi İlham Mirzəzadə APA-ya açıqlamasında bildirib ki, bina ötən əsrin əvvəllərində tikilib və 26 mənzildən ibarətdir:
“Bir müdddət əvvəl “Azərdövlətlayihə” Dövlət Baş Layihə İnstitutunun əməkdaşları ilə birgə keçirdiyimiz baxış zamanı bina əsaslı təmirə əlverişsiz sayılıb. Qısa vaxt ərzində ayrılacaq dövlət vəsaiti hesabına sakinlər üçün yeni bina tikilib təhvil veriləcək”.
İdarə rəisi onu da bildirib ki, yeni bina tikilib başa çatana kimi, sakinlərin kirayə haqları da dövlət tərəfindən qarşılanacaq.
