Lənkəranda yağış və ildırımla müşayiət olunan güclü külək bir sıra fəsadlar törədib.
Güclü külək əsasən rayonun elektrik təsərrüfatına ciddi ziyan vurub. Şəhərin əksər küçələrində, eləcə də kəndlərdə irigövdəli ağaclar aşıb.
Aşan ağacların əksəriyyəti elektrik naqillərinin üzərinə düşərək xətlərin qırılmasına və bəzi ərazilərdə elektrik enerjisinin verilişində fasilələrin yaranmasına səbəb olub.
Şəhidlər Xiyabanı küçəsində irigövdəli ağac vətəndaşa məxsus hasarın və qaz borusunun üzərinə aşıb. Nəticədə qaz borusu və sayğac sıradan çıxıb.
Şəhərin Kiçik Bazar adlanan ərazisində isə ağac hərəkətdə olan, Ehtiram Fərəcova məxsus “Chevrolet Cruze” markalı avtomobilin üzərinə aşıb. Nəticədə nəqliyyat vasitəsinə ciddi ziyan dəyib.
Aidiyyəti qurumların əməkdaşları ərazilərə cəlb olunublar. Bəzi küçələrdə aşan ağaclar xüsusi avadanlıqlar vasitəsilə budanaraq yol kənarına çəkilib.
Hazırda fasilələrin yarandığı ərazilərdə elektrik enerjisinin verilişinin tam bərpası istiqamətində işlər davam etdirilir. / APA/
