Los-Anceles
Los-Ancelesdə baş verən etirazlar səbəbilə şəhər rəhbərliyi fövqəladə tədbirlər görüb. AzPost xəbər verir ki, şəhərin meri Karen Bass, paytaxtın bəzi mərkəzi hissələrində komendant saatı tətbiq olunduğunu elan edib.
Merin sözlərinə görə, bu qərar etirazlar zamanı baş verə biləcək qanunsuzluqların qarşısını almaq məqsədi daşıyır. Karen Bass sakinləri şəhərin mərkəzindən uzaq durmağa çağıraraq, komendant saatını pozanların məsuliyyətə cəlb olunacağını vurğulayıb.
Eyni zamanda, Los-Ancelesə Milli Qvardiya qüvvələrinin yeridilməsi ABŞ dövlət büdcəsinə ciddi xərcə başa gələcək. “Associated Press” agentliyinin məlumatına görə, hərbi qüvvələrin yerləşdirilməsi üçün 134 milyon dollar ayrılıb. Bu məbləğin böyük hissəsi logistika, yerləşdirmə və təminat xərclərinə sərf olunacaq.
Xatırladaq ki, etirazlar iyunun 7-də ABŞ İmmiqrasiya və Gömrük Xidmətinin şəhər mərkəzində keçirdiyi reyd zamanı qanunsuz miqrantların saxlanılmasından sonra alovlanıb. Artan gərginlik səbəbilə Prezident Donald Tramp 2 minə yaxın Milli Qvardiya əsgərinin şəhərə göndərilməsinə göstəriş verib.
Gərgin vəziyyət fonunda Donald Tramp daha bir sərt açıqlama ilə çıxış edib. ABŞ Prezidenti bildirib ki, iyunun 14-də Amerika Ordusunun yubileyinə həsr olunmuş hərbi parad zamanı etiraz aksiyaları olacağı təqdirdə, güc tətbiq ediləcək.
“Etiraz etmək istəyənlər böyük güclə qarşılaşacaq”, – deyə Tramp Ağ Evdə jurnalistlərə bəyan edib. Prezident etirazçıların ABŞ-ni sevmədiyini və təhlükə yaratdığını da əlavə edib.
Hazırda Los-Ancelesdə təhlükəsizlik tədbirləri maksimum dərəcədə gücləndirilib. Həm komendant saatı, həm də hərbi qüvvələrin varlığı şəhərdə ciddi nəzarət yaradıb. Etirazların davam edib-etməyəcəyi və iyunun 14-də hansı hadisələrin baş verəcəyi isə böyük maraqla gözlənilir.
