“Minsk Qrupunun Qarabağ nizamlanması ilə bağlı fəallaşmasını dəstəkləyirik” –

Moskva yeni reallıqları şərt kimi irəli sürdü
02 Sentyabr 2021 - 18:55

“Azərbaycan-Ermənistan münasibətlərinin normallaşması Moskvanın diqqət mərkəzindədir. Bizim bu istiqamətdə siyasətimiz aktivdir”.

Bunu Rusiya Xarici İşlər Nazirliyinin rəsmi nümayəndəsi Mariya Zaxarova bu gün keçirdiyi ənənəvi brifinqdə bildirib.

“Bizim əsas səylərimiz üçtərəfli razılaşmaların həyata keçirilməsinə cəmləşib. Prioritetlər sırasında Qarabağda humanitar problemlərin həlli, Ermənistan-Azərbaycan sərhədində gərginliyin deeskalasiyası, Cənubi Qafqaz regionunda iqtisadi və nəqliyyat əlaqələrinin açılması var. Biz ATƏT-in Minsk Qrupunun həmsədrlərinin mövcud mandat əsasında yeni regional reallıqları adekvat şəkildə nəzərə almaqla, Qarabağ nizamlanması ilə bağlı işinin fəallaşmasını dəstəkləyirik. Hesab edirik ki, həmsədrlər Bakı ilə İrəvan arasında inamın yüksəlməsinə, eləcə də humanitar məsələlərin həllinə kömək edə bilər. Hal-hazırda yeni rusiyalı həmsədr İqor Xovayev regional səfərə çıxıb. Onun Azərbaycan rəhbərliyi ilə görüşü olub, qarşıda analoji təmasları Ermənistanda olacaq”, – deyə Rusiya XİN rəsmisi vurğulayıb.