“Crocus City Hall”da terror aktı törətməkdə şübhəli bilinən iki nəfər Bryansk vilayətində saxlanılıb.
Azpost.info bildirir ki, bu barədə Rusiya Dövlət Dumasının deputatı Aleksandr Xinşteyn Telegram kanalında bildirib.
“İlkin məlumata görə, şübhəlilərin idarə etdiyi “Renault” markalı avtomobil gecə saatlarında Karaçay rayonunun Xatsun kəndi ərazisində aşkar edilib. Avtomobil hüquq-mühafizə orqanlarının əməkdaşlarının “dayan” tələbinə məhəl qoymayıb və qaçmağa cəhd edib”.
Təqib zamanı atəş açılıb və avtomobil aşıb: “Bir terrorçu yerindəcə saxlanılıb, qalanları isə meşəyə qaçıb. Axtarışlar nəticəsində saat 03:50 radələrində ikinci şübhəli də tapılaraq saxlanılıb. Digərlərinin axtarışı davam edir. Əməliyyata bütün hüquq-mühafizə orqanları cəlb olunub. “Renault” markalı avtomobildən PM tapançası, AKM avtomatı üçün maqazin və Tacikistan vətəndaşlarına məxsus pasportlar aşkar edilib”, – Xinşteyn yazıb.
Bundan əvvəl Tacikistan Xarici İşlər Nazirliyi bəyanat yayaraq, öz vətəndaşlarının Crocus City Hall-da törədilən terror aktında iştirakını təkzib etmişdi.
