İsrailin xarici kəşfiyyat xidməti “Mossad”ın rəhbəri Roman Qofman ilk dəfə Suriyanın yeni xarici işlər naziri Əsəd əş-Şeybani ilə birbaşa telefon danışığı aparıb.
Azpost.info xəbər verir ki, bu barədə The Times of Israel məlumat yayıb.
Danışıq avqustun 14-də baş tutub və əsas müzakirə mövzusu Türkiyənin Suriya ərazisindəki hərbi mövcudluğu olub.
Reuters-ə danışan, vəziyyətdən məlumatlı üç mənbənin bildirdiyinə görə, tərəflər Türkiyə hərbi qüvvələrinin Suriyadakı yerləşdirilməsi məsələsini müzakirə ediblər. İsrailin qonşu ölkədə Türkiyənin hərbi iştirakının genişlənməsi ilə bağlı narahatlığı son dövrlərdə artıb.
Telefon danışığı İsrailin Suriyanın şimalındakı hərbi aviabazaya hava zərbələri endirməsindən bir neçə gün əvvəl baş tutub. Bu baxımdan Qofmanla əş-Şeybani arasındakı təmas regionda hərbi fəallığın və gərginliyin artdığı dövrə təsadüf edib.
İsrail rəsmiləri telefon danışığının keçirildiyini rəsmi şəkildə təsdiqləməyiblər. “Mossad”ın fəaliyyəti ilə bağlı sorğuların yönləndirildiyi İsrail Baş nazirinin ofisi Reuters-in müraciətinə dərhal münasibət bildirməyib. Suriya Xarici İşlər Nazirliyinin nümayəndəsi də sorğuya cavab verməyib.
İsrail kəşfiyyatının rəhbəri ilə Suriyanın yeni hakimiyyətinin xarici siyasət üzrə əsas nümayəndəsi arasında birbaşa əlaqənin qurulması diqqətçəkən hadisə kimi qiymətləndirilir.
Bu təmas xüsusilə Bəşər Əsəd rejiminin devrilməsindən sonra İsrail nümayəndələri ilə Suriyanın yeni rəhbərliyi arasında baş tutan ən mühüm birbaşa əlaqələrdən biri hesab olunur.
