Bakı şəhərində “Qarabağ Əlilləri və Veteranları” İctimai Birliyinin təşkilatçılığı və Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilən “Müharibə əlilləri və veteranlarına hüquqi və psixoloji dəstək” layihəsinin yekun tədbiri baş tutdu.
Bu barədə Qarabağ Əlilləri və Veteranları İctimai Birliyinin sədri Növrəstə Yusifova məlumat verib. Onun sözlərinə görə, tədbir şəhidlərin əziz xatirəsinin bir dəqiqəlik sükutla yad edilməsi ilə açıldı. Ardınca layihə rəhbəri, “Qarabağ Əlilləri və Veteranları” İctimai Birliyinin sədri Növrəstə Yusifova çıxış edərək layihənin məqsədləri, fəaliyyət istiqamətləri və əldə olunan nəticələr barədə məlumat verdi. Yekun görüşdə layihənin hüquqşünası Sədrəddin İsgəndərov, Əmək və Əhalinin Sosial Müdafiəsi Nazirliyi yanında İctimai Şuranın üzvü İradə Rzazadə, eləcə də Qarabağ müharibəsi iştirakçıları iştirak etdilər.
Çıxışında Sədrəddin İsgəndərov layihənin yalnız hüquqi maarifləndirmə ilə məhdudlaşmadığını, həm də müharibə iştirakçılarının hüquqlarının qorunması, dövlət qurumlarına müraciət imkanlarının artırılması və real problemlərin həllinə dəstək göstərilməsi baxımından mühüm əhəmiyyət kəsb etdiyini vurğuladı.
İradə Rzazadə isə layihə çərçivəsində qaldırılan məsələlərin Əmək və Əhalinin Sosial Müdafiəsi Nazirliyi yanında İctimai Şurada da müzakirəyə çıxarılacağını və müvafiq dövlət qurumlarına təqdim ediləcəyini qeyd etdi.
Tədbir zamanı canlı bağlantı vasitəsilə müraciət edən şəxslər dinlənildi, onların üzləşdiyi problemlər müzakirə olundu və aidiyyəti qurumlara yönləndiriləcək qeydlər aparıldı. Qeyd edildi ki, layihə başa çatdıqdan sonra da müharibə əlilləri və veteranlarının məsələləri diqqətdə saxlanılacaq.
Sonda layihə rəhbəri Növrəstə Yusifova Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinə və tədbir iştirakçılarına təşəkkürünü bildirdi.
