Müharibəyə rekord xərcləmələr səbəbindən yaranan kəsiri bağlamaq üçün Rusiya hökuməti iri biznesdən federal büdcəyə dəstək verməyi tələb edir.
Azpost.info xəbər verir ki, məlumatlı mənbələr bildiriblər ki, bu tələbi Rusiya Maliyyə Nazirliyi qoyub, əks halda “əlavə mənfəət vergisinin” dərəcəsini ikiqat artırmaqla hədələyib.
Hökumət iri şirkətlərdən 2021-2022-ci illərdə əldə etdiyi mənfəətin 5 faizini gözləyir. Məbləğ növbəti altı ay ərzində ödənilməsə, rəqəm 10 faizə qədər artacaq.
Əlavə mənfəət vergisi haqqında qanun 2024-cü il yanvarın 1-dən qüvvəyə minəcək. Buna baxmayaraq, hökumət sahibkarları vaxtından əvvəl ödəməyə təşviq etmək niyyətindədir.
Maliyyə Nazirliyi vergidən əvvəl xalis mənfəəti 1 milyard rubldan çox olan şirkətlərdən ümumilikdə 300 milyard rubl gözləyir. Bu pul xəzinədəki “boşluqları” doldurmaq üçün nəzərdə tutulub.
Yanvar-mart aylarının yekunlarına görə, büdcə neft və qaz gəlirlərinin 45 faizini, iqtisadiyyatın qeyri-resurs sektorlarından yığımların 3,5 faizini itirib və ümumi xərcləri 8 trilyon rubl olmaqla 2,4 trilyon rubl kəsir yaradıb.
Hökumətin hərbi xərcləri 1,5 dəfə artırmasından və məxfi xərclərə rekord məbləğdə – 2,4 trilyon rubl xərclədikdən sonra son 12 ay ərzində xəzinədəki boşluq 7 trilyon rubla çatıb.
“Deustche Bank” analitiklərinin hesablamasına görə, Avropa embarqosu, neft endirimləri və Avropaya qaz tədarükünün azalması səbəbindən Rusiya iqtisadiyyatı gündə 500 milyon dollar itirir. Onların proqnozuna görə, bu il büdcə 1,5-2 trilyon rubl vergi daxilolmalarını itirəcək və onun kəsiri nəzərdə tutulan 3 trilyon rubl əvəzinə 5 trilyona qədər artacaq.
Azpost.info
