“Ukraynada müharibə başlayandan sonra dəyəri 1,5 milyard dollardan çox olan 40-dan çox şirkət Rusiyadan Qazaxıstana köçüb”.
Azpost.info xəbər verir ki, bu barədə Qazaxıstan milli iqtisadiyyat nazirinin müavini Bauyrjan Kudabergenov bildirib.
“Bu gün bizdə konkret olaraq 41 şirkət köçürülüb”, – o deyib.
Nazir müavininin sözlərinə görə, söhbət emal sənayesi, İT və rəqəmsallaşma, eləcə də dağ-mədən sənayesi müəssisələrindən gedir.
Onun sözlərinə görə, ümumi kapitalı 1 milyard dollar olan daha 37 Rusiya müəssisəsi tezliklə Qazaxıstana köçə bilər. Hazırda hökumət onların köçürülməsi üzərində işləyir.
“Biz prosesi ilin sonuna qədər başa çatdırmalıyıq. Mütləq 37 şirkət olacağını deyə bilmərəm. Ola bilsin ki, bir az az və ya bir az çox”, – Kudaybergenov qeyd edib.
Ümumilikdə Qazaxıstana köçmək istəyənlərin siyahısında 30-dan çox ölkədən 400-ə yaxın şirkət var. Öz növbəsində, Nazirlər Kabinetinin rəhbəri Oljas Bektenov qeyd edib ki, Qazaxıstan investorların hökumət və hüquq-mühafizə orqanlarının təzyiqlərindən qorunmasına zəmanət verir.
Azpost.info
