Kapital Bank
Son günlər sosial şəbəkələrdə Kapital Bank-ın kart sahiblərinin narazılıqları müzakirə olunmaqdadır. Müştərilər iddia edirlər ki, bank kartlarından onların icazəsi olmadan müəyyən məbləğlər silinir və bu zaman heç bir təsdiq SMS-i də göndərilmir.
AzPost bildirir ki, istifadəçilərdən Turanə Qarayevanın sözlərinə görə, təxminən üç ay əvvəl onun kartından 50 dollar çıxılıb, halbuki hesab yalnız manatla olub:
“Heç bir kod gəlmədən pul çıxıldı. Təhlükəsizlik xidmətini özləri yaradıb, özləri də sıradan çıxara bilərlər. Zəng vuranda isə müxtəlif bəhanələr gətirirlər” – deyə şikayətçi bildirib.
Digər istifadəçilər də oxşar problemlə qarşılaşdıqlarını təsdiqləyiblər. Onlardan biri qeyd edib ki, işsizlik sığortası adı altında kartdan vəsait silinib:
“Mənim işsizliyimin banka nə dəxli var? Mənə bu barədə heç vaxt məlumat verilməyib” – deyə şikayətçi yazıb.
Başqa bir müştəri isə bankla yaşadığı oxşar təcrübəni belə izah edib:
“Kartımdan borc kimi məbləğ tutulmuşdu. Müraciət etdim, yalnız Mərkəzi Bankın qaynar xəttinə zəng etdikdən sonra vəsait geri qaytarıldı”.
Hüquqşünasların fikrincə, bank kartından vəsaitin müştərinin razılığı olmadan silinməsi “İstehlakçıların hüquqlarının müdafiəsi haqqında” qanuna və bank xidmətləri ilə bağlı müqavilə öhdəliklərinə ziddir. Ekspertlər hesab edirlər ki, bu cür hallarda vətəndaşlar əvvəlcə bankın özünə, nəticə əldə olunmadıqda isə Mərkəzi Banka və məhkəməyə müraciət edə bilərlər.
Qeyd edək ki, hazırda Kapital Bank tərəfindən məsələ ilə bağlı ictimaiyyətə rəsmi açıqlama verilməyib.
