StarexGlobal
Paytaxt sakini Təranə Həsənova Starex kargo şirkətindən ciddi narazılıq edib. AzPost-a müraciət edən vətəndaş bildirib ki, bu ilin avqustun on doqquzunda onun bağlaması ölkəyə gətirilib, lakin kuryer tərəfindən vaxtında təhvil verilməyib.
Şikayətçinin sözlərinə görə, həmin gün kuryer ünvanı dəqiqləşdirmək üçün onunla əlaqə saxlayıb. O isə ünvanını tam şəkildə — Binəqədi rayonu üzrə təqdim edib və əlavə olaraq konum göndərə biləcəyini də bildirib. Lakin kuryer “yox, gec olacaq, nəysə, aparıram anbara” deyərək telefonu kobud şəkildə bağlayıb.
Daha sonra vətəndaş şirkətin sosial şəbəkə səhifəsinə yazaraq məsələni diqqətə çatdırıb. Cavab olaraq bağlamanın “təxmin edilən son tarixdə çatdırılacağı” bildirilib. Halbuki, bağlama hələ avqustun on doqquzundan anbarda olub və məqsədli şəkildə saxlanılıb.
Təranə Həsənova ən çox narahatlıq doğuran məqam kimi şirkətlə telefon əlaqəsini göstərir: “Şəxsi gündəlik ehtiyacım üçün ayırdığım pulu kontur yükləyib zəng etdim, amma operator hər dəfə standart cavab verərək məsuliyyətdən yayınmağa çalışdı. ‘Bilmirik, ən qısa zamanda çatdırılacaq’ dedilər və telefonu üzümə bağladılar”.
Şikayətçi hesab edir ki, bu cür kobud və laqeyd münasibət kargo sektorunda yolverilməzdir. O, bağlamasını hələ də ala bilmədiyini, məhsulun isə ya itirildiyini, ya da mənimsənildiyini düşünür.
Vətəndaş məsələ ilə bağlı aidiyyəti qurumların araşdırma aparmasını və müvafiq tədbirlər görülməsini tələb edir.
