Bank of America analitikləri hesab edirlər ki, ABŞ və İran arasında hərbi əməliyyatların hazırkı intensivliyi davam edərsə və ilin ikinci yarısında Hörmüz boğazının açılması istiqamətində irəliləyiş əldə olunmazsa, dünya bazarında neftin qiyməti bir barel üçün 95-120 dollar səviyyəsində qalacaq.
Associated Press (AP) bankın hesabatına istinadən xəbər verir ki, neftin bu qiymət aralığında qalması Hörmüz boğazında gəmiçilik fəaliyyətinin bloklanmasının davam etməsi şərti ilə mümkündür.
Əgər gərginliyin daha da artması nəticəsində Yaxın Şərqdə iri enerji infrastrukturlarına zərər dəysə, neftin qiyməti 150 dollara qədər yüksələ bilər.
Bununla yanaşı, Bank of America-nın əsas ssenarisinə görə, ilin ikinci yarısında neftin orta qiyməti bir barel üçün 83 dollar təşkil edəcək. Bu ssenari Hörmüz boğazından neft tranzitinin tədricən bərpa olunacağını nəzərdə tutur.
ABŞ və İsrail İranla müharibəyə fevralın 28-də başlayıb. İyun ayında Vaşinqton və Tehran bütün cəbhələrdə, o cümlədən Livanda hərbi əməliyyatların dərhal dayandırılmasını nəzərdə tutan anlaşma memorandumu imzalayıb.
Lakin iyulun 8-nə keçən gecə ABŞ İran ərazisinə genişmiqyaslı zərbələri bərpa edib. Vaşinqton İranı əldə olunmuş razılaşmaların, o cümlədən Hörmüz boğazı ilə bağlı şərtlərin pozulmasında ittiham edib.
Dünya neft ticarətinin təxminən 25 faizi və mayeləşdirilmiş təbii qaz ticarətinin təxminən 20 faizi Hörmüz boğazından keçir.
Daha sonra ABŞ administrasiyası İrana qarşı genişmiqyaslı hərbi güc tətbiqindən faktiki olaraq imtina etdiyinə və ölkəni sanksiyalar vasitəsilə iqtisadi cəhətdən sıxışdırmağa çalışacağına dair siqnal verib.
