39 Nobel mükafatçısı Qərb ölkələrini Ukraynaya dəstəyi gücləndirməyə və Vladimir Putini legitim prezident kimi tanımamağa çağırıb.
Azpost.info xəbər verir ki, müraciəti imzalayanlar arasında fiziologiya və ya tibb üzrə, fizika üzrə, kimya üzrə ədəbiyyat üzrə, iqtisadiyyat üzrə Nobel mükafatı laureatları var.
“Ukraynadakı müharibə və Aleksey Navalnının qətli təkcə Rusiya və Ukraynanı narahat etmir. Putin rejimi bütün bəşəriyyət üçün birbaşa və açıq təhlükə olduğunu göstərdi. 2000-ci ildə hakimiyyətə gəldikdən sonra Putin sistemli şəkildə postsovet demokratik institutlarını məhv edib və keçmiş SSRİ ölkələrində münaqişələri qızışdırıb. Biz dünya liderlərini və bütün xoşməramlı insanları cənab Putin və onun cinayətkar rejimi haqqında istənilən illüziyalardan əl çəkməyə çağırırıq. Tarix bizə öyrədir ki, təcavüzkarı sakitləşdirmək insanlığa qarşı növbəti cinayətlərə gətirib çıxarır. Heç bir müvəqqəti qazanc buna haqq qazandıra bilməz. Biz Münhen-1938-in təkrarlanmasının qəti əleyhinəyik!” – Nobel mükafatçılarının müraciətində deyilir.
Bununla yanaşı, onlar dünya liderlərini Ukraynaya hərbi yardımı əhəmiyyətli dərəcədə artırmağa, Rusiyadakı müxalifəti və repressiyaya məruz qalan vətəndaşları dəstəkləməyə çağırırlar. Nobel mükafatı laureatları dünya liderlərindən rusiyalı siyasi məhbusların – Vladimir Kara-Murza, İlya Yaşin, Liliya Çanışeva və başqalarının azadlığa buraxılmasına köməklik göstərmələrini də xahiş ediblər.
Azpost.info
