Oslo polisi və bələdiyyəsi narkotik alverçiləri və cinayətkar qruplar arasında nağd pul dövriyyəsini məhdudlaşdırmaq məqsədilə şəhərin mərkəzində bir neçə bankomatı demontaj edib.
Bu gün Norveçdə alış-verişin yalnız 3-4 faizi nağd şəkildə həyata keçirilsə də, paytaxtın mərkəzində çoxlu bankomatlar olub. Polisin fikrincə, onlar cinayətin cazibə mərkəzinə çevrilib. Belə bankomatların ətrafında quldurluq, dələduzluq və narkotik vasitələrin açıq dövriyyəsi qeydə alınıb.
Mart ayından bəri altı bankomat artıq demontaj edilib. Planlaşdırma və Tikinti İdarəsi (PBE) bunu sakinlərin təhlükəsizliyi üçün narahatlıq kimi izah edir. Polis isə qeyd edir ki, sakinlər və müəssisələr bu cür tədbirlərin müsbət təsirini görürlər.
Bu arada, dünya üzrə 50 min bankomata sahib olan “Euronet” qərardan apellyasiya şikayəti verib. İndi işə əyalət qubernatoru baxır və o, bankomatların “tikinti və texniki qurğular” kateqoriyasına aid edilib-edilməməsinə qərar verməlidir. Bələdiyyə və polis israr edir ki, həssas ərazilərdə bankomatlar yalnız təhlükəsizliyin mövcud olduğu mağazalarda, ticarət mərkəzlərində və ya nəqliyyat mərkəzlərində quraşdırılmalıdır.
