“Bizim tibbi xidmətlər zərfi ilk olaraq 1500 xidmətlə başlamışdı. Daha sonra bu rəqəmi 1900, 2500 və 3200-ə qaldırırıq”.
Bunu İcbari Tibbi Sığorta üzrə Dövlət Agentliyinin İdarə heyətinin sədri Zaur Əliyev Milli Məclisin İqtisadi siyasət, sənaye və sahibkarlıq komitəsinin iclasında deyib.
Onun sözlərinə görə, bu, vəsaitə uyğun olaraq mərhələli şəkildə həyata keçirilir.
Zaur Əliyev qeyd edib ki, onkoloji xəstəliklərlə bağlı Dövlət Proqramı olduğu üçün bunu Xidmətlər Zərfinə salmağı planlaşdırmayıblar: “Amma gördüyümüz kimi tələb çox olduğuna görə növbəti illərdə tam həcmdə olmasa da, bunu xidmətlər zərfinə sala bilərik. Bizi narahat edən məsələ 44 milyonluq Dövlət Proqramıdır. Amma ehtimalıma görə, ən azı 200 milyon manat xərc olmalıdır, bəlkə də daha çox. Biz çalışdıq ki, Dövlət Proqramı ilə bağlı məlumat alaq və təəssüflər olsun ki, bu məlumatlar bizə verilmədi. Hesablama aparmaq və bilmək istəyirik ki, bunun xidmətlər zərfinə salınmasının real xərci nə ola bilər”.
