ady
“Azərbaycan Dəmir Yolları” QSC-nin (ADY) onlayn bilet sistemində texniki uyğunsuzluqla bağlı bəzi sərnişinlər narazılıq bildiriblər. Onlar aldıqları biletlərin kassada keçərli sayılmadığını və qatara buraxılmadıqlarını iddia edirlər.
AzPost xəbər verir ki, “Oxu.az”a müraciət edən Mirkamal Əliyev bildirib ki, mart ayında Qəbələdən Bakıya qayıdarkən bu cür problemlə üzləşib. Onun sözlərinə görə, onlayn qaydada aldığı iki biletdən yalnız biri 10 manat cərimə ilə geri qaytarılıb, digəri isə etibarsız sayılıb və qaytarılmayıb. Səbəb kimi onlayn alış zamanı yalnız FİN kodunun daxil edilməsi, lakin şəxsiyyət vəsiqəsinin seriya nömrəsinin göstərilməməsi qeyd olunub. Nəticədə qatarda bələdçi tərəfindən onlara yerində bilet təqdim olunub və ödəniş terminal vasitəsilə həyata keçirilib.
Digər bir sosial media istifadəçisi Ariz Hüseynov isə valideynlərinə onlayn bilet alarkən ata adının daxil edilmədiyini, bu səbəbdən onların qatara buraxılmadığını bildirib. Onun sözlərinə görə, ata adı sistem tərəfindən məcburi sahə kimi göstərilmədiyi üçün bu məlumatı əlavə etməyib. Lakin qeydiyyat zamanı problem yaşanıb və onlara biznes sinifdə əlavə bilet təklif olunub.
Məsələ ilə bağlı sorğuya cavab olaraq ADY-nin İctimaiyyətlə əlaqələr şöbəsinin müdiri Bəxtiyar Hacıyev bildirib ki, Mirkamal Əliyevin qeyd etdiyi tarixdə – martın 29-da Qəbələ-Bakı reysində qeydiyyat zamanı məlum olub ki, sərnişinlər yalnız FİN kodunu daxil edib, şəxsiyyət vəsiqəsinin seriya nömrəsini isə sistemə əlavə etməyiblər. Bu məlumat uyğunsuzluğu səbəbindən əməkdaşlar tərəfindən onların səfərinin həmin biletlərlə mümkün olmadığı bildirilib və kassaya müraciət edərək biletləri qaytarmaq tövsiyə olunub.
B.Hacıyev qeyd edib ki, bilet qaytarıldıqda həmin yer 15 dəqiqədən 1 saata qədər sistemdə yenidən satışa çıxarılır. Bu səbəbdən sərnişinlərin səfərini təmin etmək məqsədilə qatarda digər yerlər təklif olunaraq QU-57 sənədi rəsmiləşdirilib və onlara yerində ödənişlə bilet təqdim olunub. Qaytarılmayan biletlə bağlı aparılan araşdırma nəticəsində məlum olub ki, sərnişin yalnız bir biletin QR kodunu kassaya təqdim edib. Kamera görüntüləri də bunu təsdiqləyib. Bu məlumat sərnişinə təqdim olunub.
Ariz Hüseynovun şikayətinə gəlincə, məlum olub ki, 5 iyulda Dəllər-Biləcəri reysinə bilet alan R.Hüseynov və N.Hüseynova qeydiyyat zamanı müvafiq sənədləri təqdim edərkən ata adı sistemdə qeyd edilməyib.
ADY nümayəndəsi bildirib ki, onlayn bilet alışı zamanı bütün sahələr, o cümlədən ata adı bölməsi doldurulmalıdır. Lakin hazırkı mərhələdə sistem bu sahəni məcburi etmədən fəaliyyət göstərir, məqsəd ata adı olmayan sərnişinlərin də bilet alışına imkan yaratmaqdır.
“Bu səbəbdən ata adı olmayan və ya daxil edilməyən biletlərlə qeydiyyat zamanı problem yaşana bilər. Sərnişinlərin səfərini davam etdirməsinə dəstək məqsədilə həmin reysdə standart sinifdə yer olmadığından sərnişinlərə biznes sinifdə yer təklif olunub və ödəniş QU-57 sənədi əsasında aparılıb. Biletlərin geri qaytarılması ilə bağlı məlumat verilsə də, sərnişinlər biletlərini qaytarmayıblar”, – deyə B.Hacıyev bildirib.
ADY rəsmisi sərnişinlərə onlayn bilet alarkən sistemdəki bütün məlumatların, o cümlədən şəxsiyyət vəsiqəsinin seriya nömrəsi və ata adının düzgün şəkildə daxil edilməsini tövsiyə edib. Bu, qeydiyyat zamanı yarana biləcək texniki problemlərin qarşısını almağa kömək edər.
