Rusiya Ukraynaya təzyiq göstərmək üçün Kaxovskaya su elektrik stansiyasını partladıb.
Azpost.info bildirir ki, bu barədə Ukraynanın Cənub Müdafiə Qüvvələrinin Birləşmiş mətbuat mərkəzinin rəhbəri Nataliya Qumenyuk “United News” telemarafonunun efirində bildirib.
“Ruslar strukturun bir hissəsini partladıblar. Onlar müdafiə qüvvələrinə təzyiq etmək, bütövlükdə Ukraynaya təzyiq göstərmək üçün texnogen şantaj kartından istifadə edirlər. Əks-hücumun olacağı yerdə daha gözləməyə gücləri çatmır. Bu yolla təhrik etməyə çalışırlar”, – deyə Qumenyuk bildirib.
Onun dediyinə görə, nə etdiklərini anlayan işğalçılar özləri də təxliyə olunur: “Çünki bu dağıntıdan ilk növbədə Dnepr çayının sol sahili əziyyət çəkir. Çünki o, coğrafi baxımdan daha aşağıdır və müvafiq olaraq suyun birinci hissəsi – əsas daşqın ora düşəcək”, – Qumenyuk izah edib.
İşğalçılar tərəfindən partladılmış Kaxovskaya SES-i əvvəlki formada bərpa etmək mümkün deyil. Bu barədə “Ukrhidroenerqo” məlumat yayıb: “Maşın otağının içəridən partlaması nəticəsində Kaxovskaya SES tamamilə dağılıb. Stansiyanı bərpa etmək mümkün deyil”, – məlumatda deyilir.
“Ukrhidroenerqo” vəziyyəti təhlil edir, mütəxəssislər dağıntının miqyasını, suyun sürətini və həcmini dəqiqləşdirməyə çalışırlar.
Həmçinin Kaxovskaya su elektrik stansiyasının bəndinin partlaması ilə əlaqədar təxliyə qatarları işə salınıb.
TASS-ın Rusiya fövqəladə hallar xidmətindəki mənbəsi bildirib ki, ilkin məlumata görə, Kaxovskaya SES-in 28 aşırımından 11-i dağılıb. Onun sözlərinə görə, 80 yaşayış məntəqəsi sel zonasına düşə bilər.
Azpost.info
