Ermənistanın Baş naziri Nikol Paşinyan Rusiya tərəfindən erməni mallarına tətbiq edilən məhdudiyyətləri tənqid edib. O bildirib ki, problem həll olunmasa, bu vəziyyət Avrasiya İqtisadi İttifaqı-nin gələcəyini təhlükə altına qoya bilər.
Paşinyan bu fikirləri jurnalistlər üçün keçirdiyi brifinqdə səsləndirib.
Baş nazirin sözlərinə görə, hazırda Aİİ faktiki olaraq iflic vəziyyətindədir və normal fəaliyyət göstərə bilmir. “Hazırda Avrasiya İqtisadi İttifaqı faktiki olaraq iflic vəziyyətindədir və normal fəaliyyət göstərmir. Bu, təkcə Ermənistanın deyil, bütün birliyin problemidir”, – deyə Paşinyan vurğulayıb.
O qeyd edib ki, Ermənistanın Aİİ-dən çıxmaq planı yoxdur. Bununla yanaşı, ölkənin öz iqtisadi və siyasi alternativlərini formalaşdırmaq hüququna malik olduğunu bildirib.
Paşinyanın sözlərinə görə, bu mövqeyini Rusiya Prezidenti Vladimir Putin ilə də müzakirə edib. “Mən bunu Vladimir Putinə də demişəm. Ermənistan bu yolla irəliləyəcək. Seçkiqabağı dövrdə də demişdim ki, elə vəziyyət yaranmamalıdır ki, Ermənistanın alternativi olmasın. Alternativsiz dövr artıq geridə qalıb”, – deyə Ermənistanın Baş naziri bildirib.
Paşinyanın bu açıqlaması son dövrlərdə Moskva ilə İrəvan arasında iqtisadi münasibətlərdə müşahidə olunan gərginliyin fonunda diqqət çəkir.
