qaz nəqli
Avropa Komissiyası Ukrayna ilə sülh sazişi bağlansa belə, Avropa İttifaqı ölkələrinin Rusiya qazının alışını bərpa etməsi ehtimalını istisna edib. Avropa İttifaqının qüvvədə olan qanunvericiliyi Rusiya qazından mərhələli şəkildə imtinanı nəzərdə tutur. Bu qərar müharibənin gedişindən və mümkün siyasi razılaşmalardan asılı deyil.
Bunu Avropa Komissiyasının rəsmi nümayəndəsi Paula Pinyu oktyabrın 28-də Brüsseldə keçirilən brifinqdə bildirib.
“Bizim qüvvədə olan qanunvericiliyimiz Rusiyadan, xüsusilə də qaz daxil olmaqla, qalıq yanacaqların idxalının bərpa edilməsinə imkan vermir”, – deyə Pinyu “Şimal axını” qaz kəmərinin mümkün fəaliyyətə başlaması ilə bağlı suala cavabında vurğulayıb.
Avropa Komissiyasının enerji məsələləri üzrə nümayəndəsi Anna-Kaisa İtkonen isə xatırladıb ki, Aİ artıq Rusiyadan boru kəmərləri ilə nəql olunan qazın və mayeləşdirilmiş təbii qazın (LNG) idxalına mərhələli şəkildə son qoyulması barədə qanun qəbul edib.
Təsdiqlənmiş qrafikə əsasən, Rusiyadan mayeləşdirilmiş təbii qaz tədarükünə tam qadağa 2027-ci ilin əvvəlindən, boru kəmərləri ilə qaz tədarükünə isə 2027-ci ilin payızından qüvvəyə minməlidir.
Bu açıqlama ABŞ Prezidenti Donald Trampın administrasiyasının Ukraynadakı müharibənin mümkün nizamlanması çərçivəsində Avropaya Rusiya qazının alışını bərpa etməyi təklif etməsi barədə məlumatların yayıldığı vaxta təsadüf edib.
The New York Times qəzeti daha əvvəl bu təşəbbüs barədə məlumat yayıb. Avropa Komissiyası isə Rusiya enerji resurslarına qayıdış ehtimalını rədd edib.
N.Talıblı
