Polşada robotlar ölkənin Rəqəmsal İşlər Nazirliyinin qarşısında etiraz aksiyasına çıxıb.
Azpost.info Reuters-ə istinadən bildirir ki, robotlar süni intellekt üzərində daha güclü nəzarət və tənzimləmələrin tətbiq edilməsini tələb ediblər.
Qeyri-adi aksiya süni intellekt və robot texnologiyalarının əmək bazarına təsiri ilə bağlı ictimai müzakirələrin aparılmasını istəyən Democratism sosial hərəkatı tərəfindən təşkil olunub.
Hərəkat süni intellektin sürətli inkişafının gələcəkdə iş yerlərinə və əmək bazarına necə təsir göstərəcəyi ilə bağlı narahatlıqların müzakirə edilməsinin vacibliyini vurğulayır.
Robotların nazirlik qarşısında nümayişə çıxarılması isə süni intellektin artıq yalnız texnoloji məsələ deyil, əmək, iqtisadiyyat və sosial siyasətlə birbaşa əlaqəli mövzuya çevrildiyinə diqqət çəkən simvolik aksiya kimi qiymətləndirilir.
Süni intellektin bir sıra peşələrdə insan əməyini əvəz etməsi ehtimalı son illərdə dünyanın müxtəlif ölkələrində əsas müzakirə mövzularından birinə çevrilib. Texnologiyanın tərəfdarları onun məhsuldarlığı artıracağını və yeni peşələr yaradacağını bildirirlər. Tənqidçilər isə bəzi sahələrdə iş yerlərinin azalması və əmək bazarında ciddi dəyişikliklərin baş verə biləcəyindən narahatdırlar.
Polşadakı aksiya da bu müzakirənin getdikcə daha fərqli və diqqətçəkən formalar aldığını göstərir.
