Bazar ertəsi, mayın 9-da Rusiya Moskvanın Qırmızı Meydanında Qələbə Gününü möhtəşəm hərbi parad və aviaşou ilə qeyd edəcək.
“Vladimir Putin ola bilsin ki, Sovet İttifaqının 1945-ci ildə nasist Almaniyası üzərində Qələbə Günündən rus xalqına özünün Ukrayna üzərində qələbəsini hədiyyə etmək üçün istifadə edəcəyinə ümid edirdi. Lakin Ukraynaya qarşı müharibə Moskvanın planlaşdırıldığı kimi getmədi”.
Azpost.info bildirir ki, bu barədə hərbi təhlilçi, nufuzlu London Kral Kollecinin müdafiə araşdırmaları üzrə professoru Maykl Klark yazıb.
Onun sözlərinə görə, sabah Rusiya lideri bu müharibənin hazırkı nəticələrini necə qələmə verəcəyindən asılı olmayaraq, bir məsələ aydındır: bu elə bir müharibədir ki, Rusiya onu heç bir ağlabatan mənada uda bilməz.
“İki ay ərzində Kreml sürətlə A planından B planına və sonra isə C planına keçib. İndi hətta ruslar Donbası və bütün cənubu işğal etsələr belə, onlar həmin əraziləri sonu bəlli olmayan müddət ərzində idarə etməli olacaqlar. Bu ərazidə isə Rusiya işğalçılarının orada olmasını istəməyən milyonlarla ukraynalı yaşayır. Odur ki, Putinin bu yolu “zalımcasına davam etməkdən” başqa, elə bir ağlabatan seçimi yoxdur“-, britaniyalı ekspert hesab edir.
Klarkın fikrincə, Vladimir Putin üçün geriyə yol yoxdur: “Onun yeganə siyasi strategiyası Ukraynadakı müharibəyə fərqli bir don geydirməkdən ibarət ola bilər. Putin bu müharibəni Rusiyanı məhv etmək şansından ləzzət alan Qərb “nasistləri” və “imperialistləri” ilə Rusiyanın ölüm-dirim mübarizəsinin bir hissəsi kimi təqdim etməyə çalışa bilər. Elə bu səbəbdəndir ki, Ukraynaya hücumu Rusiyanın Avropanın qalan hissəsi ilə “Böyük Vətən Müharibəsi 2.0” kimi təqdim edilməsi təhlükəli ideyasını ortaya atmaq Putinin maraqlarına cavab verir.
Yəqin ki, mayın 9-da Qələbə Günündə bu haqda daha çox eşidəcəyik”.
