“Qəbələ Yazarlarına Dəstək” İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə həyata keçirdiyi “Qəbələ gənclərinin yaradıcılıq imkanlarının artırılması” layihəsi çərçivəsində növbəti 5-ci təlimini keçirib.
12 iyul 2025-ci il tarixində Qəbələ Dövlət Peşə Təhsili Mərkəzində baş tutan təlimdə 14 nəfər gənc iştirak edib.
Tədbiri təşkilat rəhbəri Rəna Mahmudova açaraq, layihənin məqsədləri, əhəmiyyəti və donor barədə iştirakçılara məlumat verib. O, çıxışında təlimlərin gənclərin yaradıcılıq potensialının üzə çıxarılmasında mühüm rol oynayacağını vurğulayıb:
“Əminəm ki, qarşıdakı təlimlərimiz də yüksək səviyyədə təşkil olunacaq və biz əsas məqsədimizə – gənclərin yaradıcılıq sahəsində uğurlar qazanmasına – nail olacağıq. Hər birinizə uğurlar arzulayıram. İnanıram ki, bu təlimlər sizin yaradıcılığınıza güclü təkan verəcək və nəticədə yeni-yeni zövq oxşayan, dəyərli əsərlər ərsəyə gələcək.”
Təlimçi Fəxrəddin Babayev bildirib ki, əvvəlki dərsin sonunda iştirakçılara tapşırıq verilmişdi – hər kəs öz istədiyi janrda bir yazı hazırlayıb təqdim etməli idi. Çünki bu günkü mövzu hekayə, oçerk, qəzəl və roman janrlarını əhatə edirdi.
İştirakçılardan bir çoxu şeir və qəzəl janrında yazdıqlarını qeyd ediblər. Ən gənc iştirakçı isə hekayə janrına müraciət etdiyini bildirib və yazdığı hekayəni təlimçiyə təqdim edib.
Müəllif öz hekayəsi barədə qısa məlumat verdikdən sonra mətnini iştirakçılar qarşısında səsləndirib. Daha sonra təlimçi müvafiq janrlar üzrə nəzəri bilgiləri geniş şəkildə izah edib, iştirakçıların suallarını cavablandırıb.
Təlimin sonunda iştirakçılar üçün çay və kofe süfrəsi təşkil olunub. Çay süfrəsi ətrafında iştirakçılar öz yazdıqları şeirləri qiraət ediblər. Təlimçi onların çıxışlarını dinlədikdən sonra məmnunluğunu ifadə edib və yaradıcılıqla bağlı faydalı tövsiyələr verib.
