Restoranlarda istifadə olunan stəkan və çəngəl-bıçaqların parıltısını qorumaq üçün düzgün yaxalama, az miqdarda yuyucu vasitədən istifadə və mineral ərpin təmizlənməsi vacibdir. URA.RU nəşri yazır ki, ictimai iaşə obyektlərində tətbiq olunan bir neçə üsulla evdə də eyni nəticəyə nail olmaq mümkündür.
Əsas sirlərdən biri qabların çox isti su ilə yaxalanmasıdır. İsti su səthdən daha tez buxarlandığı üçün stəkanlarda və boşqablarda su damcıları, eləcə də mineral ləkələr daha az qalır. Qabları yuduqdan sonra mümkün qədər isti su ilə yaxalamaq və dərhal qurumağa qoymaq tövsiyə olunur.
Su sərt olduqda, yəni tərkibində çoxlu duz və mineral maddələr olduqda, son yaxalama üçün zəif sirkə məhlulundan istifadə edilir. Bunun üçün isti su ilə doldurulmuş ləyənə bir-iki xörək qaşığı 9 faizlik süfrə sirkəsi əlavə olunur. Sirkə mineral çöküntülərin həllinə və qələvi yuyucu vasitənin qalıqlarının təmizlənməsinə kömək edir.
Şüşə qablar və badələr üçün limon turşusu məhlulu da uyğundur. Bir litr isti suya yarım çay qaşığı limon turşusu əlavə etmək kifayətdir. Bu üsul ərpi aradan qaldırmağa və şüşənin şəffaflığını bərpa etməyə kömək edir.
Restoranlarda qabların yuyulması zamanı diqqət edilən digər məqam yuyucu vasitədən az istifadə etməkdir. Həddindən artıq köpüyü yaxalamaq çətin olur və qabların üzərində nazik təbəqə qala bilər. Şüşə və büllur qablar üçün xüsusi yuyucu vasitələrə və ya adi təsərrüfat sabununa üstünlük verilir.
Çəngəl, qaşıq və bıçaqları yuduqdan sonra quru parça ilə silmək və cilalamaq məsləhət görülür. Onları digər qablarla birlikdə çanaqda saxlamaq isə düzgün deyil. Bu, cızıqların və əhəng ərpinin yaranma riskini artırır.
Beləliklə, restoranlardakı kimi parlaq qab-qacaq əldə etmək üçün bahalı məişət kimyəvisinə ehtiyac yoxdur. Əsas məsələ qabları diqqətlə yaxalamaq, mineral çöküntüləri təmizləmək və düzgün qurutmaqdır.
Sunay
