Göbələk
Avstraliyanın Viktoriya ştatında baş vermiş səs-küylü zəhərlənmə işi ilə bağlı məhkəmə yekunlaşıb. Ekspertlər 50 yaşlı Erin Pattersonu ərinin üç qohumunu zəhərli göbələklərlə bişirdiyi yeməklə öldürməkdə və dördüncü şəxsi öldürməyə cəhddə təqsirli bilib.
AzPost xəbər verir ki, hadisə 2023-cü ilin iyul ayında Gippsland bölgəsindəki Leongatha şəhərində baş verib. Erin Patterson keçmiş ərinin valideynləri Don və Gail Pattersonu, habelə xalası Heather Wilkinsonu nahara dəvət edib. Yeməkdə zəhərli milçək mantarı göbələklərindən hazırlanan mal əti pastası verilib. Qurbanlardan ikisi avqustun dördündə, biri isə bir gün sonra dünyasını dəyişib. Dördüncü zərərçəkən – Heatherin həyat yoldaşı İan Wilkinson – xəstəxanada uzun müalicədən sonra sağ qalıb.
Məhkəmə zamanı məlum olub ki, Patterson dörd qonağı “xərçəng xəstəliyi” bəhanəsi ilə evinə dəvət edib. Lakin məhkəmə sübut edib ki, ona heç vaxt belə diaqnoz qoyulmayıb. Qadının keçmiş əri dəvət edilmiş, lakin iştirak etməmişdi.
Təqsirləndirilən şəxs hadisəni “dəhşətli qəza” adlandıraraq, niyyətinin zərər vermək olmadığını bildirib. Müdafiə tərəfi onun yeməkdən sonra panikaya düşdüyünü, polisin suallarına isə yalan cavab verdiyini etiraf edib. Lakin bu arqumentlər münsiflər heyətini inandıra bilməyib.
Məhkəmədə 50-dən çox şahidin ifadəsi dinlənilib. Hakim andlı iclasçılara medianın təsirindən uzaq qalmağı və yalnız sübutlara əsaslanmağı tapşırıb. Nəticədə yeddi kişi və beş qadından ibarət münsiflər heyəti Erin Pattersonu bütün ittihamlar üzrə yekdilliklə təqsirli hesab edib.
