Rusiya vətəndaşı Tatyana cəmi 33 dollara Belarusda yerləşən 18-ci əsrə aid Radzivill sarayını alıb.
Azpost.info bildirir ki, Dyatlovo şəhərində tərk edilmiş tarixi bina uzun müddət boş qalıb və yararsız hala düşüb.
Sputnik Belarus-un məlumatına görə, saray hərracda 90 Belarus rubluna satılıb. Tatyana yeganə təklif verən şəxs olub.
Saray II kateqoriyalı tarixi və mədəni irs obyekti hesab olunur. Onun təxminən 1751-ci ildə italyan memar Domeniko Fontananın layihələri əsasında tikildiyi güman edilir.
Yeni sahibi uşaqlıqdan öz sarayına sahib olmağı arzuladığını bildirib. Anası tarixçi, atası isə bərpaçı olan qızın ona görə də tarixi binalara marağı gənc yaşlarından başlayıb.
Tatyana keçmiş sarayda aparthotel, kafe və interaktiv muzey məkanları açmağı planlaşdırır. Yerli hakimiyyət orqanları ilə razılaşmaya əsasən, binanın bir hissəsi turistlərr üçün açıq olacaq.
Bundan əlavə, investor mərkəzi girişi və bir neçə otağı bərpa etmək, bağ salmaq və binanın yanında tədbir məkanları yaratmaq niyyətindədir.
